föstudagur, 17. júní 2016

flottar bókahillur | № 2 bókalisti sumarsins



Ég er skotin í bókahillum. Ekki í fyrsta sinn. Í júlítölublaði Elle Decoration UK er innlit sem ég er búin að fletta fram og til baka yfir kaffibollanum, í hús í LA sem er með svo mörg smáatriði á hreinu (,House on the Hills', ljósmyndari Stephanie Bjelkstam). Í opnum hillum í stofunni eru bækur og skrautmunir sem er raðað smekklega án þess að hillurnar virki yfirhlaðnar; bókum er raðað lóðrétt og lárétt sem gerir stíliseringuna enn áhugaverðari. Það er sem hillurnar andi og þær kallast á við gólfmottuna. Virkilega vel gert. Þessa dagana er ég að lesa nokkrar bækur og fljótlega mun ég gagnrýna eina hér á blogginu: Decorative Textiles from Arab and Islamic Cultures: Selections from the Al Lulwa Collection. Egypska bómullarábreiðan með ásauminum út til vinstri er smá sýnishorn.

Bókalisti sumarsins er tilbúinn (kannski ætti ég að segja sá fyrri þessa sumars) og samanstendur af leikritum og ævisögulegu efni. Nýverið skilaði ég á bókasafnið æviminningum Arthur Miller Timebends (virkilega vel skrifuð, mæli með bókinni) og fékk að láni tvö leikrit eftir hann. Á sama degi var ég að fletta uppi verkum eftir Virginia Woolf á netinu og var svo heppin að finna tvær notaðar bækur (3. bindi dagbókar hennar er komið í hús og lítur út eins og nýtt - elska svoleiðis fund). Hér er listinn minn:

· All My Sons eftir Arthur Miller
· Death of a Salesman eftir Arthur Miller
· Off the Road: Twenty Years with Cassady, Kerouac and Ginsberg eftir Carolyn Cassady
· The Diary of Virginia Woolf - Volume 3: 1925-1930 í ritstjórn Anne Olivier Bell
· The Letters of Virginia Woolf - Volume II: 1912-1922 í ritstjórn Nigel Nicolson og Joanne Trautmann
· Testament of Youth: An Autobiographical Study of the Years 1900-1925 eftir Vera Brittain

Sumir myndu kalla þetta frekar þungan sumarlestur en ég er bara ekki sú tegund lesanda sem nælir sér í stafla af léttefni í næstu bókabúð. Börnin voru að gera grín af mér um daginn og sögðu að ég læsi skrýtnar bækur. Ég er að reyna að muna rétt orðalag sem eitt þeirra notaði, „enskar yfirstéttarsnobbbókmenntir“ (English upper-class snob literature) eða eitthvað í þá áttina. Ég skellti upp úr.


Á aðeins persónulegri nótum: Ég óska ykkur gleðilegs þjóðhátíðardags en í dag eigum við hjónin 18 ára brúðkaupsafmæli. Í dag er einnig föstudagspizzudagur en eiginmaðurinn er staddur erlendis vegna vinnu. Við börnin ætlum bara að fá okkur franska osta, snittubrauð og vínber . . . og súkkulaði. Eigið góða helgi!

myndir mínar | heimild - efsta mynd: Elle Decoration UK, júlí 2016, bls. 116 · Stephanie Bjelkstam


Engin ummæli:

Skrifa ummæli